Udalak, gizarte, hezkuntza, polizia eta osasun-eragile anitzekin batera, dokumentu berri hau osatu du biktimei arreta eraginkorragoa, seguruagoa eta pertsonalizatuagoa eskaintzeko.
Derio, 2025eko apirilaren 3an. Derioko Udalak aurrerapauso garrantzitsua eman du indarkeria matxistaren aurkako konpromisoan, “Derion indarkeria matxistaren biktima diren emakumeei arreta emateko erakundeen arteko jarduera eta koordinaziorako I. protokoloa” onartu eta abian jarrita.
Protokolo horrek jarduera-esparru amankomun bat ezartzen du udalerrian indarkeria matxistak prebenitzeko, antzemateko eta eraginkortasunez artatzeko, Gizarte Zerbitzuen, Udaltzaingoaren, Ertzaintzaren, Osakidetzaren, ikastetxeen eta inplikatutako beste agente giltzarri batzuen baterako lana artikulatuz.
Esther Apraiz alkateak azpimarratu duenez, “protokolo honek instituzio eta udalerri gisa dugun konpromisoa indartzen du. Emakume, haur eta pertsona guztiek Derio leku segurua dela sentitzea nahi dugu, ez daudela bakarrik, irmotasunez eta, batez ere, gizatasunez babesten duen herria garela sentitzea”.
Partaidetza eta prestakuntza-prozesu baten emaitza izan da dokumentua, eta, horri esker, beharrak antzeman eta dauden egiturak sendotu ahal izan dira. Protokoloaren sarreran nabarmentzen denez, tresna hau erreminta bizia da, etengabeko hobekuntzara bideratua eta Derioko errealitate espezifikora egokitua.
Helburuen artean daude langileen etengabeko prestakuntza, erakundeen arteko koordinazioa, jarraipena eta ebaluazioa egiteko datu-bilketa, eta biktimaren kontzeptua zabaltzea, hurbilekoak eta LGTBIQA+ kolektiboko pertsonak gehituz.
Ekimen horrekin, Deriok berretsi egiten du indarkeria matxistarik gabeko gizartearekin duen konpromisoa, eta biktimei arreta integrala, enpatikoa eta pertsonalizatua ematen die.
