- Udalak martxoan zehar publiko guztiei zuzendutako egitarau anitza antolatu du, hitzaldiak, ekitaldi instituzionalak, kultur proposamenak eta hezkuntza-ekintzak barne.
Derioko Udalak M8a, Emakumeen Nazioarteko Eguna, ospatzeko jarduera programa oparoa antolatu du martxorako udalerriko elkarteekin elkarlanean. Hausnarketa, kultura eta parte-hartzea uztartzen dituen proposamen anitza da, adin guztietako herritarrei zuzendua.
Egitaraua martxoaren 3an (asteartea) hasiko da, 17:00etan, Kultur Birikan, Sutondoan elkarteak antolatutako “Desmantelando el mito del amor romántico” hitzaldiarekin. Aukera paregabea izango da ohiko eredu afektiboak ikuspegi kritikoz aztertzeko eta berdintasunean eta errespetuan oinarritutako harremanak sustatzeko.
Martxoaren 8an (igandea), Emakumeen Nazioarteko Egunean bertan, garatuko da ekitaldi nagusia. 11:00etan, frontoian, adierazpen instituzionala irakurriko da. Ondoren, berdintasunaren aldeko martxa egingo da, adin eta maila guztietako herritarrei irekia, Untza Mendi Taldearekin elkarlanean. Ekitaldirako egindako motxila moreak banatuko dira aurten, Gureneren irudiarekin eta “Etorkizuna gurea da – El futuro es nuestro” leloarekin.
Martxoaren 9an (astelehena), ‘La Sextruck’ ekimen pedagogikoa Derioko Eskolara hurbilduko da, 9:00etatik 12:30era eta 14:30etik 16:00etara. Ikasleekin hezkuntza afektibo-sexuala, berdintasuna eta indarkeria matxisten prebentzioa landuko dira.
Egitarauak martxoaren 16an (astelehena) jarraituko du, 18:00etan, Kultur Birikan, “¿Qué llevamos las mujeres en el bolso?” ipuin-saioarekin, helduei zuzenduta.
Azkenik, martxoaren 17an (asteartea), “Una rubia muy legal” filmaren inguruko bideo-foruma ospatuko da Kultur Birikan, 17:00etan, Sutondoanek antolatuta.
Udalak animatzen ditu herritarrak, bai eta interesa duten guztiak ere, antolatutako jardueretan parte hartzera eta, guztion artean, berdintasunezko eta indarkeriarik gabeko Derio bat eraikitzen jarraitzera.
