Datorren ekainaren 23an Deriok berriro ospatuko du San Juan gaua, adin guztietako herritarrei zuzendutako egitarauarekin. Kultura, musika, gastronomia eta tradizioa uztartuko dira egun horretan eskolaren inguruan.
Eguneko ekintzak 18:30ean hasiko dira Lainomendi Dantza Taldearen dantza-erakustaldiarekin, eta 19:00etan disko-festa egingo da. Arratsaldeko 19:30ean Ipar-Alde Abesbatzarekin kantu-poteoa egingo da herriguneko tabernetatik eta 20:30ean txokolatada eta txitxi-burduntzia salduko dira.
Egunari amaiera emateko, 22:00etan San Juan sua piztuko da, hori baita ospakizun honetako une berezi eta adierazgarrienetako bat.
Udalak herritar guztiak animatu nahi ditu urtero herritarrak jai giroan eta elkartasunean biltzen dituen jai honetan parte hartzera.
