- Udalaren aurrekontua aurtengoa baino % 4,19 handiagoa izango da 2026an (+518.181 euro), eta finantza-egonkortasunarekiko eta derioztarren ongizatearekiko konpromisoa dute ardatz.
- Udal gobernuak oposizioko taldeek aurkeztutako 21 zuzenketetatik 14 onartu ditu eta inbertsioak 827.996 eurokoak izango dira. Proiektu nagusienen artean futbol zelaiaren ondoan taberna bat sortzea, hainbat espazio publiko estaltzea eta udal kiroldegia handitu eta modernizatzeko lehen fasea aurkitzen dira.
Derioko Udalak 12.886.673 euroko aurrekontua onartu du 2026ko ekitaldirako, hau da, % 4,19ko hazkundea izan du aurreko urtearekin alderatuta. Kontuak erantzukizun eta iraunkortasun irizpideekin diseinatu dira, zorrik ez sortzeko eta gastu osoa baliabide propioekin finantzatzeko konpromisoari eutsiz.
“Aurrekontu orekatua eta soziala da, eta, batez ere, asmo handikoa. Udal zerbitzuak indartzen jarraitzeko eta etengabeko hobekuntzan aurrera egiteko aukera ematen diguten kontuak dira, Deriok udalerri modernoa, inklusiboa eta bizi-kalitate handikoa izaten jarrai dezan”, adierazi du Esther Apraiz alkateak.
Dokumentuak hiru ildo nagusi ditu ardatz:
- Oinarrizko zerbitzu publikoak hobetzea, hala nola garbiketa, eraikinak eta espazio publikoak mantentzea, kultura, kirola eta gizarte-zerbitzuak.
- Udal-plantilla sendotzea, egitura eraginkorrago eta egonkorrago batekin, eta aldi baterako kontratazioen aldeko apustua egitea, premia justifikatuta dagoenean bakarrik.
- Aurrekontu-egonkortasunaren printzipioari eustea, zor publikora jo beharrik gabe.
Inbertsio garrantzitsuenak: gozamenerako eta jardueretarako espazioak
Inbertsioen partida 827.996 eurokoa da, eta hiru proiektu nagusi nabarmentzen dira:
- Futbol-zelaiaren inguruan taberna bat sortzea, 2026ko Partaidetza bidezko Aurrekontuetan gehien bozkatutako proiektua.
- Udalerriko hainbat eremu estaltzea, espazio publikoen erabilera sustatuz.
- Udal kiroldegia handitzeko eta modernizatzeko lehen fasea, azken parte-hartze prozesuetan jasotako eskaerei erantzunez.
Halaber, gogoratu behar da aurrekontu-prozesua irekita egon dela talde politiko guztien ekarpenetara. Zentzu horretan, udal gobernuak oposizioko bi taldeek jasotako 21 zuzenketetatik 14 onartu ditu.
Sozialisten zuzenketei dagokienez, bost onartu dira guztira. Horien artean nabarmentzekoak dira frontoian eta Kultur Birikan aterpeak eraikitzeko aurreproiektuak, aterpeak baita Urkiola eta Unbe kaleetan eta Almazene eta kantxen arteko sarbidea hobetzea.
EH Bilduren onartutako bederatzi zuzenketei dagokienez, honako proposamen hauek daude: memoria historikoari buruzko azterlan bat egitea (Udala Gogorarekin harremanetan jarriko da, eta hura gauzatzeko oinarriak ezarriko ditu), Txosnako trafikoa berroganizatzea, funts bibliografikoen partida handitzea, iturri bat eta paperontzi gehiago jartzea San Cristobalerako pasealekuan, rokodromo bat eraikitzea (gobernuak Aldekonen, elizaren ondoan, erabilera anitzeko gune berri bat sortzeko proiektuaren barruan sartuko du), tokiko komertzioei laguntza handitzea (Udalak konpromisoa hartu du bonuen kanpaina bat aktibatzeko eta bonuetarako aplikazio informatiko bat garatzeko), edo tokiko merkataritza digitalizatzeko eta lonja hutsen kopurua murrizteko ordenantza berri bat sortzea.
