- Guztira 61 proposamen aurkeztu dituzte Derioko herritarrek ekainaren 3tik 28ra bitartean egin zen prozesuaren lehen fasean.
- Kiroldegiaren berrikuntza, kirol-espazioetarako eta haurrentzako parkeetarako estalkiak, hiri-altzarien hobekuntza eta mugikortasun jasangarriaren bultzatzea izan dira gehien errepikatu diren proposamenak.
- Irailaren 12an argitaratuko da bideragarriak diren proiektuen zerrenda, eta irailaren 16tik 30era bitartean bozkatu ahal izango dira udalaren webgunearen bidez.
Derioko Udalak bultzatu duen 2026ko aurrekontu parte-hartzaileen prozesuaren bidez beste behin egiaztatu da herritarrek beren ingurua hobetzeko interesa eta konpromisoa dituztela. Ekainaren 9tik 27ra bitartean proposamenak jasotzeko aukera eman zen, eta fase horretan udalerriko 61 herritarrek ideia batzuk eman zituzten bide desberdinak erabiliz: 49 online inprimakiaren bidez, 6 posta elektronikoz eta 6 aurrez aurre.
Parte-hartzaileen profila adin-tarte askotarikoa izan da, eta 31 eta 50 urte bitartekoek parte-hartze handiena izan dute. Adinaren araberako banaketa hau izan da:
• 18 urtetik beherakoak: % 6,56
• 18-30 urte bitartekoak: % 11,48
• 31-50 urte bitartekoak: % 42,62
• 51-70 urte bitartekoak: % 37,70
• 70 urtetik gorakoak: % 0
• Adina zehaztu gabe: % 1,64
Generoaren araberako banaketari dagokionez, proposamenen % 39,34 emakumeek aurkeztu dituzte eta % 59,02 gizonek. % 1,64 proposamenetan generoa zehaztu gabekoa izan da.
Kiroldegiaren berrikuntza, estalkiak eta proposamen kultural berriak
Proposamenak askotarikoak izan dira. Kiroldegiaren berrikuntza osoa nabarmendu da bereziki, instalazioak hobetzeko, ikastaroen eskaintza zabaltzeko, klimatizazioa eta langile gehiago izateko eskaerak jasota. Behin eta berriro errepikatu diren beste proposamen batzuk izan dira haurrentzako parkeetan eta kirol-espazioetan estalkiak jartzea, bizikleta elektrikoen zerbitzua ematea edo txakurren aisiarako guneak hobetzea.
Kultura alorrean, ideia hauek proposatu dira: udal-musika eskolaren sorrera, Derioren historiari buruz ikertzeko tokiko bekak, emakumeen ahalduntzerako eskola eta espazio publikoan liburu-trukerako gune berriak.
Beste alde batetik, mugikortasunari eta espazio publikoa hobetzeari buruzko proposamen ugari ere jaso dira, hala nola markesinak jartzea, bide-seinaleak hobetzea, sarbideak asfaltatzea eta bizilagunentzako aparkalekuak egitea. Halaber, proposamen batzuetan aipatu da arau espezifikoak sortu behar direla, adibidez: autokarabanak edo camper motako furgonetak aparkatzea arautuko duen ordenantza bat sortzea.
Hurrengo faseak: herritarren bozketa irailaren 16tik 30era
Proposamenen eskumenen azterketa eta azterketa teknikoa eta ekonomikoa egin ondoren,
irailaren 12an argitaratuko da bideragarriak diren proiektuen zerrenda, udalaren webgunean (www.derio.eus) eta udaletxeko iragarki-taulan.
Ondoren,
irailaren 16tik 30era, botoak emateko fasea egingo da. Herritarrek beren proiektu gustukoenak bozkatu ahal izango dituzte, udalaren webgunearen bidez egingo den online inkesta baten bidez. Gainera, parte hartu nahi duten arren horretarako beharrezkoak diren ezagutzak edo baliabideak ez dituzten pertsonentzat Udalak Gertuan Herritarrentzako Arreta Zerbitzuko eta Kultur Birikako langileen laguntza eskainiko du.
Azkenik,
urriaren 15ean argitaratuko dira bozketa-fasearen emaitzak, berriz ere udal webgunean eta iragarki-taulan. Derioko Udalak herritar guztiak animatu nahi ditu prozesuaren azken fase horretan parte hartzera, denon artean aurrekontu irekiagoak, ordezkaritza handiagokoak eta herritarren lehentasunekin bat datozenak izan ditzagun.
