- Udal gobernuak ia bi hilabetez aztertuko du hiru gune horietako aparkalekuen erabilera, datu objektiboak eskuratu eta balizko neurriak baloratzeko.
Azken asteotan, Ganbe, Aldekone eta San Isidro elizaren inguruko auzoetako zenbait bizilagunek aparkalekuen erabilerari lotutako kezkak helarazi dizkiote Udalari. Adierazi dutenez, udalerritik kanpoko ibilgailuen kopurua handitzen ari da, eta, zenbait kasutan, pertsona horiek autoa auzo horietan uzten dute ondoren aireportura joateko. Astikeneko poligonoan ere antzeko egoeraren bat antzeman da.
Ekarpen horiei erantzunez, Derioko Udalak neurriak hartu ditu egoera zehatz-mehatz ezagutzeko, eta zonalde horietako aparkalekuari buruzko azterlan tekniko bat egingo du. Helburua kaleetako aparkalekuen benetako erabilera aztertzea izango da. Horretarako, landa-lanak egingo dira ia 2 hilabetez, okupazio-maila neurtzeko, matrikulak erregistratzeko eta ibilgailuen jatorria zehazteko (Derion edo kanpoan bizi diren pertsonenak diren). Azterketa lanegunetan zein asteburuetan garatuko da, ordutegi desberdinetan, egoeraren diagnosi osoa izateko.
“Azterlan honi esker, aparkalekuaren erabileraren benetako argazkia izango dugu, eta udalerriaren beharrei modu arduratsuan erantzun ahal izango diegu”, adierazi du Esther Apraiz alkateak.
Landa-lanak amaitu ondoren, Udalak lortutako ondorioak aztertuko ditu, eragindako eremuetan mugikortasuna eta aparkatzea hobetzen jarraitzeko.
