Abuztuaren 12an ikusgai izango den eguzki-eklipsea dela eta, Derioko Udalak herritarren eskura jarri ditu Eusko Jaurlaritzak fenomeno astronomiko hau segurtasunez behatzeko eta ikusmena babesteko prestatutako gomendioak.
Gomendio nagusia eguzki-eklipseak behatzeko bereziki diseinatutako betaurreko homologatuak erabiltzea da, ISO 12312-2 araua betetzen dutenak. Izan ere, horiek dira eguzki-argiaren intentsitatea murrizteko eta erradiazio ultramorea zein infragorria blokeatzeko diseinatuta dauden bakarrak.
Bereziki azpimarratu behar da garrantzitsua dela betaurrekoek ISO 12312-2 erreferentzia dutela egiaztatzea; izan ere, eguzkitako betaurreko konbentzionalak, baita ISO 12312-1 araua betetzen dutenak ere, ez dira egokiak eguzkiari zuzenean begiratzeko, eta horiek erabiltzeak lesio okular larriak eta itzulezinak eragin ditzake.
Halaber, gomendatzen da eklipsea 45 segundo baino gehiago jarraian ez behatzea, eta behaketak atsedenaldi laburrekin tartekatzea.
Osotasun-fasean bakarrik
Eusko Jaurlaritzak gogorarazten du osotasun-fasean soilik, ilargiak eguzkiaren diskoa erabat estaltzen duenean, beha daitekeela eklipsea begi hutsez. Eguzkiaren lehen argi-izpia berriro agertzen den unean, berehala jarri behar dira berriz homologatutako betaurrekoak.
Ikusmena babestea
Eguzkiari babes egokirik gabe zuzenean begiratzeak erretinan kalte itzulezinak eragin ditzake, baita eguzkiaren diskoaren zati txiki bat bakarrik ikusgai dagoenean ere. Arriskuen artean honako hauek daude:
- Erretinako erredurak.
- Ikusmena partzialki galtzea.
- Begietako kalte iraunkorrak.
Era berean, ez dira erabili behar eguzki-iragazki homologaturik gabeko kamerak, prismatikoak, teleskopioak edo bestelako tresna optikoak.
Eklipsea arduraz gozatu
Derioko Udalak herritarrak animatzen ditu Eusko Jaurlaritzaren gomendio hauek jarraitzera, eguzki-eklipseaz segurtasunez gozatzeko, eta gogorarazten du prebentzioa dela ikusmenean kalteak saihesteko modurik onena.
Informazio gehiago:
