- Lehen Hezkuntzako eraikineko komunak eta aldagelak osorik eraberrituko dira, irisgarritasuna hobetuz eta instalazioak modernizatuz.
- Jarduera honekin batera, patio inklusiboa ere eraiki berri da, Udalak hezkuntza-azpiegiturak etengabe hobetzeko duen konpromisoa berretsiz. Bi hobekuntzek 900.000 eurotik gorako inbertsioa suposatu dute.
Derioko Udalak Herri Ikastetxeko hezkuntza-kalitatearekin eta ikasleen ongizatearekin duen konpromisoa berretsi du 900.000 eurotik gorako inbertsioa eginez bi jardueretan. Uda honetan, eskolarik gabeko aldia aprobetxatuz, Lehen Hezkuntzako 1. eraikineko komunak eta aldagelak erabat berritzeko lanak hasi dira. Esku-hartzeak 223.500 euroko aurrekontua du, eta lehenengo eta bigarren solairuetako instalazioak guztiz eraberritzea barne hartzen du. Irisgarritasuna hobetu eta diseinua eguneratuko da, zentroari espazio modernoagoak, erosoagoak eta funtzionalagoak eskainiz. Obra honek 2020. urtean beheko solairuan egindako jarduketak osatzen ditu.
Gainera, gogoratu beharra dago joan den apirilean amaitu zuela Udalak patio inklusibo berriaren eraikuntza. Anbizio handiko proiektua izan da, ikastetxearen kanpoko espazioa erabat eraldatu duena, jolas-ingurune sortzaile, inklusibo eta irisgarri bihurtuz. Patio berritzaile honek berdeguneak, ur-jolasak, musika-panelak, oreka-eremuak, bi metroko zabalera duen bidexka irisgarria eta 155 m²-ko eremu estalia ditu, euria egiten duen egunetan erabiltzeko. Udalaren inbertsioa 677.659 eurokoa izan da, eta horietatik 360.000 euro Eusko Jaurlaritzako Hezkuntza Sailak diruz lagundu ditu.
Jarduera hauekin, Udalak erantzuna ematen die hezkuntza-komunitateak — zuzendaritzak, irakasleek eta familiek — helarazitako eskaerei, eta ikasleek beren beharretara egokitutako azpiegiturez gozatu ahal izango dutela bermatzen du.
“Udalaren eta Eskolaren arteko sintonia onak elkarrekin lan egiteko aukera paregabea ematen digu, kalitatezko hezkuntza publikoan aurrera egiten jarraitzeko”, nabarmendu du Esther Apraiz alkateak. “Gure konpromisoa da hezkuntza-instalazioak mantentzea eta hobetzea, garai berrietara egokituz eta ikastetxeko haur eta profesionalentzako ingurune inklusiboak, seguruak eta estimulatzaileak ziurtatuz”.
Azken obra honekin, Udalak Eskolako hiru eraikinetako komun eta aldagela guztiak berritu ditu, urteetako hobekuntza-prozesu bati amaiera emanez. Hain zuzen ere, azken lau udatan egin dira aipatutako eraberritze lanak.
